མི་ལོ་ལྔ་བཅུའི་རྗེས་ཀྱི་མི་ཚེའི་རིན་ཐང།
ཀྱི་ཧུད། མི་ཚེའི་བགྲང་བྱ་ལྔ་བཅུ་བརྒལ་སོང་ངོ།།
མི་ཚེའི་དཔྱིད་ཀྱི་དཔལ་ཡོན་ཡལ་སོང་ངོ།།
བགྲང་བྱ་ལྔ་བཅུའི་མི་ཚེ་ཡི་སྐྱིད་སྡུག།
ནད་མེད་བདེ་སྐྱིད་ངང་ནས་བཞུད་སོང་ངོ།།
ཕྱི་མ་ག་འགྲོ་གདེང་ཚོད་ང་ལ་མེད།།
ལྷག་མའི་མི་ཚེ་ནད་ཉུང་འཚོ་བར་འདོད།།
ཕྱི་མ་ལྔ་བཅུའི་ལ་རྒྱབ་ཀྱི་མི་ཚེའི་ལམ་ཕྲང་འདི་ཇི་ལྟར་བྱས་ནས་རྗེས་སྙེགས་དགོས་སམ།
ཞེས་འདྲི་ཚིག་ཅིག་གིས་ལྔ་བཅུ་བར་བཞུད་པའི་མི་ཚེ་ལ་ཕྱི་བལྟས་ཤིག་བྱས།
ངའི་མི་ཚེ་ནང་གི་མི་ལོ་ལྔ་བཅུའི་བར་རང་གི་མདུན་ལམ་འཚོལ་བ། མདུན་ལམ་རྗེས་སུ་སྙེགས་པ། མདུན་ལམ་བསུ་བ་དང་མི་ཚེ་འདི་འགྲན་རྩོད་ཀྱི་རྗེས་དེད་འོག་དཔལ་འབྱོར་གསོག་སྒྲུབ། སྤྱི་ཚོགས་ཀྱི་འགན། ནང་མི་ཁྱིམ་ཚང་གི་འགན། སེམས་ཀྱི་གཞི་མ་འཚོལ་བའི་ཕྱིར་འཇིག་རྟེན་ཆོས་བརྒྱད་ཀྱིས་ལྷད་པས་ཆོས་བྱེད་འཁུལ། མི་ཚེའི་ལམ་ཕྲང་ཀྱག་ཀྱོག་སྟེང་སྐབས་རེ་རྒྱལ། སྐབས་རེ་ཕམ། སྡོད་འཁོམ་མེད་པར་ལས་དབང་བཙན་པོས་རྗེས་དེད་འོག ལྔ་བཅུའི་ཡོལ་བའི་མི་ཚེ་འདི་ད་ཆ་ཕྱི་མའི་དུར་ཁང་གཞལ་བའི་ལམ་མདོར་མཚམས་ལ། མི་འདོད་བཞིན་མདུན་སྐྱོད་བཞུགས་པ་ལས་ཕྱི་ཤོས་ག་ལ་ཡོད།
ལས་དབང་བཙན་པོས་མི་ཚེའི་ཁ་ཕྱོགས་འདི། མ་བྱན་གྱི་འཚོ་ཐབས་ལ་སྐྱུར་བས་མི་ཚེའི་སྙིང་པོ་ཙོང་དང་སྒོག་པའི་ཤུན་པགས་ནང་ལ་ཟད།
མི་ཚེ་ལ་འགོ་རིམ་གང་ཡང་ཡོད་མིན་སྟེ་ཡིནའང་སེམས་ཀྱི་ཁྱེར་སོ་ཤིག་དགོས་ངེས།
ད་ཆ་བདག་གི་ལྷག་མའི་མི་ཚེའི་ལམ་སྣེ་འདི་གང་འདྲས་ཤིག་བསུ་ཞེ་འདོད་ན།
ཐོག་མར་རང་གིས་རང་ལ་གཅེས་སྤྲས་དགོས་འདུག
ལུས་སེམས་གཉིས་ལ་སྲུང་སྐྱོབ་ཀྱི་ཉིན་ལྟར་ལུས་སྦྱོང་དང་བདེ་སྐྱིད་ཀྱི་གཞི་མ་འཚོལ་དགོས།
བདེ་སྐྱིད་ཀྱི་གཞི་མ་འཚོལ་བའི་ཆེད་དུ་སྙི་པོའི་ལུས་ཟུངས་ལ་གནོད་པ་མེད་པ་དགོས་ངེས།
ཟས་ཀྱི་ཚོད་རེམ་པ། ཟས་ཀྱི་འཕྲོད་སྦྱོར་ཤེས་པ། ལུས་ཟུང་གསོ་བའི་ཆེད་དུ་རང་མོས་ཀྱི་ལུས་སྦྱོང་གི་ཐབས་ལམ་འཚོལ།
བདག་གི་ལྷག་མའི་མི་ཚེ་འདི་ནད་ཉུང་བདེ་ཐང་གི་མི་ཚེ་ཞིག་འཚོལ་འདོད།
དབང་པོ་མི་ཉམས་པའི་སྐབས་དབང་པོས་ཉམས་མྱོང་བསྡུས།
མིག་གིས་འཇིག་རྟེན་གྱི་དཔལ་ཡོན་གྱི་རིག
སྤུས་མོའི་འཁོར་ལོ་མི་ཉམས་གོང་འཇིག་རྟེན་རྐང་པས་སྐོར།
ཕོ་དྲོ་མི་ཉམས་གོང་འཇུ་ངོ་ཤེས་པའི་ཐོག་ནས་ལྕེས་མྱོང།
རང་འབྱུང་ཁམས་ནས་སེམས་ཀྱི་བདེ་སྐྱིད་འཚོལ།
སྡིག་ཅན་གྲོགས་པོ་རིམས་ནད་བཞིན་རིངས་ནས་ཟོན།
བསམ་ལོའི་འཁྱེར་སོ་འདི་འདྲ་ཞིག་གིས་འོག་ནས་ལྷག་མའི་མི་ཚེ་འདི་འདོད་ཆུང་ཆོག་ཤེས།
ལུས་ཟུང་གསོ་བའི་ཆེད་དུ་ལུས་སྦྱོང་ལ་དམིགས་ནས་ཡུལ་ལྗོངས་ལ་གོམ་བགྲོད།
སེམས་ཀྱི་གཞི་བདེ་འཚོལ་བའི་ཆེད་སྙིང་པོས་སྟོང་པའི་ཆབ་སྲིད་ཀྱི་གླེང་ཀ་དོར་ནས་དཔེ་ཀློག་གི་བཅུད་མྱོང་བཞིན་དུས་ཚོད་ཀྱི་སྙིང་པོ་སྲུང།
ངའི་མི་ཚེ་ལྷག་མ་འདིའི་སྙིང་པོའམ་བདེ་སྐྱིད་ཀྱི་ཚོ་བ་དེ་འདྲ་ཞིག་ལ་ངོས་འཛིན་བྱེད་ཀྱི་ཡོད།
ངས་ལྷག་མའི་མི་ཚེ་ལ་བལྟ་སྟངས་ཡང་དེ་འདྲ་ཞིག་ཡིན།
Lamyig 